لاجيت ابنسى .. واتراجع .. واسامحك
ــــــــ صاحن جروحي واشتكن لي طعونـك
كلك خيانه قول .. وشلـون ابمنحـك
ـــــــ وش موقفك من شخص .. دايم يخونك
اكبر خطا لو جيـت يمـك اصالحـك
ــــــ اوّل تحـول .. لا تغـرك .. لحـونـك
اللي تقوله صح لـو كنـت جارحـك
ـــــــ (مير) انت غارق للاسف في ظنونـك
وصفك نسيته بس .. باقـي ملامحـك
ـــــــ بنهيك وانهـي .. بالنهايـة جنونـك
ماتستحق (امـد) كفـي واصافحـك
ـــــــ مثلك غلط عمري .. وابحيا .. بدونك
لعبت دورك شاهـدات ٍ مسارحـك
ـــــــ خدعتني واظهـرت خافـي فنونـك
كنت اعتقد قلبي هو ابرز مطامحـك
ـــــــ اللي يبيـع النـاس .. لجلـه يصونـك
تعبت اسوق الشوق عندك واصارحك
ـــــــــ اخلصت لك بالحـب شوفـة عيونـك
لكن خسارة صـرت غايـة مصالحـك
ــــــــ ياليتنـي ماجيـت .. لحظـة بكونـك
بالامس كنت بنشوة الحب امازحـك
ــــــــ اخيل برقك .. واتحـرى .. امزونـك
واليوم من صفحـة حياتـي ابمسحـك
ــــــــ هديت صرحك ثم طاحـت اركونـك
ولابي عيوني لـو تصـورت تلمحـك
ــــــــ اعلنت موتك وانسجن لـي كفونـك
وان جيت تطلب ترتجيني اسامحـك
ــــــــ بهديك طعنة مـن بقايـا .. طعونـك
الأربعاء فبراير 20, 2008 10:44 am